නූතන සමාජය හා තොරතුරු තාක්ෂණය අතර අවියෝජනීය සබැඳියාවක් ඇත. තොරතුරු තාක්ෂණයේ උපයෝගිතාවය බහුවිධ ප්‍රවේශයකින් මැන බැලිය හැකි මානව නිර්මිතයකි. පරිගණක තාක්ෂණයේ නව්‍ය භාවිතය සන්නිවේදන ක්ෂේත්‍රය පුළුල් කරළීමට යටිතල පහසුකම් සපයා ඇත. එමඟින් මානව සබැඳියාවන් ඉතා සමීප කර ඇත. තරඟකාරී ජීවන රටාවක පුද්ගල ක්‍රියාකාරකම් නිසි කාල රාමුවක් තුළ පූර්ණ වශයෙන් ඉටු කරවා ගැනීම අභියෝගයක් බවට පත්ව ඇත. එබැවින්, දෛනික අවශ්‍යතාවයන් මෙන්ම ආයතන සේවාවන් දුරස්ථ ප්‍රවේශකයින් ඉටු කරවා ගැනීමට පුද්ගල හා සමාජයීය අවශ්‍යතාවයක් පවති. කළුතර කලාප අධ්‍යාපන කාර්යාලයේ නිල වෙබ් අඩවිය, අප කාර්යාලය මඟින් ලබා දෙන සේවාවන් සැපයීමේ ක්‍රියාවලිය තවදුරටත් කාර්යක්ෂම කිරීම අරමුණ කර ගත් තාක්ෂණික ප්‍රවේශයකි. ආයතන තොරතුරු හා දත්ත කළමනාකරණයට මෙන්ම පරිපාලන කටයුතු සඳහා සන්නිවේදන උපාය මාර්ගයක් ලෙස ද මෙම වෙබ් අඩවිය භාවිත කළ හැකි වේ. මෙම ප්‍රවේශය අප කාර්යාලයේ මෙහෙවර, කාර්යක්ෂම හා සඵලතාවයකින් යුතුව සේවාලාභීන් වෙත ලබා දීමට ප්‍රශස්තව පහසුකම් සපයනු ඇතැයි මම තරයේ විශ්වාස කරමි.
